Abril: Mes dos libros

No mes de abril andivemos moi ocupados na Biblio, porque celebramos o mes dos libros!!

O alumnado de 1º a 4º de Primaria recibiu a visita de Sabela Fernández Trelles, autora de dous títulos que leron este curso: "O ladrón de soños" e "A miña avoa, a miña heroína". Falounos de soños, pesadelos, do importante que é ter unha rede de apoio para superar os baches... e ata cantamos! Que importante compartir libros xuntos e reflexionar sobre eles.

Ademáis, o alumnado de 1º e 2º fixo un programa de radio sobre "O ladrón de soños", que presentaron a un concurso organizado pola editorial Xerais, a Fundación José Hermida xunto con Radio Pontevedra. 

Aquí podedes escoitalo!

No contexto lingüístico investigamos ao redor dos libros: beneficios de ler, os libros máis lidos da historia, escritores famosos, como naceu o Día do libro.... Tamén aproveitamos un recanto para gravar os booktubers, pasamos por Radio Faladoiro para facer un programa especial sobre esta conmemoración e gravamos libro-historias, usando as portadas e os títulos dos libros para contar historias breves.

Ademáis realizáronse apadriñamentos lectores nos que o alumnado de 3º a 6º, dentro do programa T+t, prepararon lecturas de contos para os máis cativos de 1º ciclo e infantil.

Ademáis fixemos o xa clásico "Hoxe no patio, libro!" aproveitando o tempo de lecer para adicar un ratiño á lectura libre e autónoma.

O alumnado de infantil  e 1º de Primaria foron ao teatro para ver unha obra basada nun dos contos máis famosos de todas as bibliotecas escolares: "A toupiña que quería saber quen lle fixera aquelo na cabeza" por parte da compañía "A xanela do Maxín".

Tamén desfrutamos moito na nosa biblio co espectáculo "A ilusión de ler" por parte da compañía "Maxia na manga", no que quedamos abraiados con moitos trucos con inspiración literaria.

E para rematar o mes de abril visualizamos todos os vídeos que se gravaron ao longo do mes recomendando lecturas, todos convertidos en auténticos Booktubers. Aquí tedes algúns exemplos!

Un mes de Abril do máis completo!! 

Lémonos!

Consello Escolar Infantil

Celebramos unha nova sesión do Consello Escolar Infantil, un espazo onde o alumnado pode falar, propoñer, opinar e axudar a mellorar o cole. Nesta convocatoria tiñamos que responder a tres preguntas que queremos manter, que queremos mellorar e que queremos engadir. A asamblea celebrouso o pasado 27 de abril onde houbo representantes de todas as aulas. Estes foron os acordos aos que chegamos e queremos compartilos con vós.

 QUE QUEREMOS MANTER: os contextos de aprendizaxe, os torneos nos recreos, os venres de cine, os timbres musicais elixidos polo alumnado, os clubes de lectura, as actividades do programa T+T, o traballo de oratoria, a saída con pernocta de fin de curso e este propio Consello onde podemos dar as nosas opinións. 

O QUE QUEREMOS MELLORAR: os baños do centro, quitar as reixas das fiestras, retirar os proxectores antigos, mellorar a comida do comedor, recuperar a zona de música da biblioteca, renovar as pelotas do patio, coidar o invernadoiro, o areeiro, a cabana de vimbio e a horta. 

E, como sempre temos ideas novas, pensamos no que NOS GUSTARÍA ENGADIR: unha casiña no patio, máis xogos infantís como tobogáns e bambáns, mesas de ping-pong, unha corda ou escaleira para subir a Yupilandia, actividades de convivencia cos coles de Bueu, unha noite de acampada no cole, un muro coas pegadas do alumnado de sexto, que cada aula teña un nome relacionado co proxecto, un taboleiro no patio para anotarse aos torneos, un buzón de propostas e máis decoración no corredor de arriba nas conmemoracións.

Sentimos ao alumnado protagonista e feliz de pertencer a esta comunidade educativa, e iso énchenos de orgullo, porque vemos que cada idea, cada palabra e cada soño compartido no Consello Escolar Infantil demostra que o noso cole medra con eles e grazas a eles.

Club de lectura en 3º e 4º

Esta semana o noso clube de lectura infantil mergullouse nunha historia tan breve como poderosa: O dedo máxico, de Roald Dahl. Unha historia que combina humor, fantasía e unha mensaxe que invita a pensar.

A protagonista desta historia ten un don moi especial: cando algo a enfada profundamente, o seu dedo índice desprende unha enerxía misteriosa capaz de transformar a realidade. E iso é exactamente o que ocorre cando observa como unha familia veciña trata aos animais sen respecto.

A partir de aí, a maxia fai o seu traballo… e os lectores tamén. Porque Dahl non só entretén: abre portas para falar de empatía, responsabilidade e das consecuencias dos nosos actos.

Compartimos impresións sobre as transformacións máis sorprendentes do libro, debatemos sobre o que significa tratar ben os animais e a natureza e inventamos outros finais, demostrando que a imaxinación infantil non ten límites.

Rematamos a sesión decorando a nosa chapa que xa forma parte da nosa coleción de chapas do clube de lectura.

Por moitas máis xuntanzas arredor dos libros!

Visita á granxa Sarantellos

O pasado 17 de marzo, e grazas á subvención da Deputación de Pontevedra dentro do programa Vive o rural, o alumnado de infantil  acudiu á Granxa Serantellos. 

Os cativos fixeron pan e compost, desfrutaron cos coellos, poliños, pavos reais, patos, ocas, porco, cabalo, cabras, cordeiros...

Foi unha xornada moi enriquecedora! 

Club de lectura 5º e 6º

Ao longo dos primeiros meses deste curso,o alumnado de 5º e 6º de primaria limos o libro “La muy catastrófica visita al zoo” de Joël Dicker.

Este libro trata duns nenos dun colexio especial, que se levaron un gran disgusto xa que o seu colexio se inundou e tiveron que trasladarse ao cole de nenos e nenas 'normais'. A partir dese momento abriron unha investigación para saber quen foi o culpable. Alí foi cando empezaron todas as catástrofes desde a inundación ata a visita ao zoo, unhas catástrofes cheas de emoción como o da clase de seguridade vial, a catastrófica clase de ximnasia...

Durante a lectura na aula, o alumnado de quinto íamos facendo un mural das personaxes e catástrofes que ían aparecendo. 

Ao rematar o libro xuntámonos, profes e o alumnado de 5º e 6º para intercambiar opinións e impresións. Fixemos preguntas sobre cal foi o noso personaxe favorito, os valores que transmiten, a nosa escena favorita...

A valoración xeral foi moi positiva, a todos e todas gustounos moito.

Recomendamos este libro porque ten valores moi importantes sobre a inclusión, sobre a diversidade e o respecto. Os nenos e nenas protagonistas tamén transmiten moita positividade e son moi graciosos. 

Este libro é adecuado para todas as persoas, sen importar a idade! 

Se che gusta partirte de risa este libro esta feito para ti.

Texto elaborado polo alumnado de quinto de primaria. 

Un Entroido con moita maxia

Como se dunha chisteira saísen os coellos dun mago, así apareceu a cativada de Infantil para darlle a benvida ao Entroido. Entre ilusións, sorrisos e moita fantasía, o patio do colexio transformouse nun escenario máxico.

Harry Potter abriu as portas a un bosque encantado no que habitaban fadas, trasnos, elfos e gnomos seguidos de personaxes saídos das películas O Mago de Oz e Wicked, enchendo cada recuncho de cor, música e fantasía.

O colexio enteiriño converteuse nun lugar, onde a imaxinación era a mellor varita e cada neno e nena, un pequeno feiticeiro capaz de facer realidade o imposible.

Todo o alumnado pasou polo esceario para entoar as cancións do proxecto, creadas con moita maxia polo profe Jose, para rematar cunha degustación de doces típicos aportados polas familias, que nos acompañaron neste día tan especial

Podedes escoitar  o programa de radio de Entroido, que gravaron os alumn@s de primeiro e segundo nos obradoiros de linguas.

Durante toda a semana estivemos atentos aos mandadiños de Torriño.

Pechamos unha época chea de maxia, pero xa estamos argallando un plan, porque a Torre Encantada dos Soños non descansa.