Moita maxia no T+t

Hoxe na biblioteca vivimos unha xornada inesquecible dentro das actividades programadas de T + t. Os padriños e apadriñad@s, tras semanas de encontros, investigación e moito ensaio, compartiron os seus traballos cun público entregado e curioso. Cada parella converteu o espazo nun auténtico escenario de ilusión, onde a creatividade e a complicidade foron protagonistas.

Cada presentación foi única, reflexo do traballo colaborativo e da imaxinación posta en marcha. Os nenos e nenas, demostraron que a aprendizaxe pode ser tamén un espectáculo, onde a expresión oral, a posta en escena e a emoción se mesturan para crear momentos memorables.

A biblioteca,converteuse nun espazo de encontro, de soños compartidos e de aprendizaxes que van moito máis alá das páxinas dun libro.

                                                    Que a maxia continúe!

Un contexto artístico moi máxico

Comezamos un contexto artístico moi especial  onde a maxia e os soños serán os protagonistas. Para comezar  a nosa aventura fixemos autorretratos creativos inspirándonos en Jan Von Holloben, con aqueles materiais que máis nos gustan e definen . Comezamos a actividade cunha presentación na que coñecemos o traballo e nos adentramos na súa arte.

                                        

 

                                           

Noutra das propostas deseñamos os nosos traxes de mag@s ao estilo de Delaunay e Kusama.  Logo dunha presentación das artistas para coñecer o seu traballo, centrámonos na súa obra para deseñar os nosos traxes de magos.

                                          

       Este curso será máxico!

Presentación do programa T+t

Para comenzar o curso, fixemos unha actividade de presentación do programa T+t, un programa que pretende mellorar a convivencia no noso centro. A actividade consistiu nun acto no que se nomeraon os padriños do alumnado e no que  grupo saíu a recoller o seu carné e a facer a presentación  oficial. 

Para iniciar a boa convivencia,  comezamos traballando unha proposta da  profe Mariló relacionada co noso proxecto, " A Torre Encantada dos Soños", onde soños e maxia foron  os protagonistas.

Por parellas tiveron que plasmar con moita creatividade un soño común e buscar algún truco de maxia para expoñer aos compañeiros, unha boa forma de comezar a coñecerse. Aquí vos amosamos algúns dos momentos vividos.

Agora o noso mural da torre encantada loce así de bonito.

      Que a maxia continúe!

Benvidos á Torre encantada dos soños

 Comezamos un novo curso cheo de ilusións aventuras e moita maxia, onde os soños serán protagonistas no novo proxecto anual que leva por título" A torre encantada dos soños". Desde a nosa biblioteca, seguiremos compartindo lecturas aprendizaxes e encontros.

A torre encantada dos soños, será o noso refuxio imaxinario, un espazo máxico onde a fantasía se mestura coa creatividade e onde cada un de nós deixará a súa pegada soñadora.

Para dar a benvida ao curso, a nosa directora deu un emocionate discurso que nos fixo reflexionar sobre os conflitos inxustos e os atentados medioambientais acontecidos nas vacacións... e así, comezamos a soñar cun mundo máis xusto. Logo da presentación do profesorado tivemos unha mañá chea de obradoiros  no que non faaltaron nin maxia nin soños.

Preparade as vosas variñas máxicas porque a Torre encantada dos soños xa abriu as súas portas. Benvidos!

CICLO DE CINE SOCIAL CON PERSPECTIVA DE XÉNERO

O CIM de Bueu organizou un pequeno CICLO DE CINE SOCIAL CON PERSPECTIVA DE XÉNERO co obxecto de facer reflexionar ao alumnado de 5º e 6º sobre os roles de xénero, a crítica social e a violencia de xénero.

Estes tres eixos temáticos articulan as curtametraxes proxectadas durante a sesión, nas que o alumnado visionou pezas audiovisuais impactantes e, por equipos, avaliou aspectos como a identificación emocional, a claridade d mensaxe e o seu impacto reflexivo. 

A actividade culminou cun debate aberto, que serviu como espazo de reflexión crítica sobre a percepción e interpretación das mensaxes audiovisuais

Un paso máis para seguir aprendendo e adquirindo valores neste COLE DE PELÍCULA!

Un mural de película está en camiño

 Esta semana recibimos na nosa escola unha visita moi especial:  Luís Davila e Mary Acuña, que se  achegaron  para comezar a traballar co alumnado no deseño dun novo mural no patio.

Agora é  o noso turno de facer propostas, debuxar soños e dar forma a ese espazo que veremos todos os días ao recreo. Algo temos moi claro e é que queremos que Torriño quede retratado nun recuncho dese mural para seguir animando a ler, soñar e voar.

Un proxecto colectivo, artístico e ilusionante que converterá o patio nun lugar de película... e de escola viva.            

Remataron a visita cun agasallo moi especial adicado.Grazas Mary e Luís por acompañarnos nesta aventura e por apoiarnos sempre.

Premios de lectura

 Rematamos o curso celebrando o pracer da lectura cun xesto especial, agasallos para os grandes lectores e lectoras de cada curso. Un pequeno recoñecemento,  cheo de emoción, que entregamos coa complicidade da nosa querida mascota Torriño.

Lembrade  que un mundo con libros é un mundo máis grande, máis soñado e máis noso. Remata o curso, si… pero as historias nunca deixan de medrar.

Aproveitamos o encontro para entregarlle ao alumnado de segundo o seu premio obtido nos Premio Hermida de Radio da man de Xerais.

Grazas a este grupo de segundo de primaria e a súa profe Sandra porque nos fixeron sentir que somos un cole de película!