Premio no concurso de podcast "O vello dos contos"

 

Hoxe escribimos estas liñas co corazón cheo de ledicia e unha emoción difícil de agochar: fomos os gañadores do concurso  A vello dos contos!

Cando decidimos presentarnos a este concurso, tíñamolo moi claro: non iamos inventar nada novo, senón aproveitar o traballo que facemos cada día; ese esforzo diario, as horas de dedicación e o agarimo que lle poñemos a cada proxecto cun gran equipo detrás tanto de profes como de alumn@s. Pensamos que a mellor carta de presentación era, simplemente, amosarlle ao mundo o que facemos de luns a venres.

Presentamos un traballo por cada categoría e fomos finalistas nos dous proxectos presentados. O alumnado de terceiro e cuarto de primaria redeu homenaxe á tradición oral galega a través da figura de Xosé Mosquera Pérez, “O vello dos contos”, destacando o seu labor como narrador e gardián das historias populares. A través dun ton emotivo, pon en valor como os contos, transmitidos de boca en boca ao longo das xeracións, forman parte da mamoria colectiva e da identidade cultural, lembrando a importancia de seguir compartindo historias para manter viva a cultura.

O alumnado de 5º e 6º preparou un programa adicado ao Día do Libro achegando a lectura á cativada mediante diálogos e entrevistas. Pon o foco nos beneficios de ler, recolle opinións do alumnado e destaca o papel da biblioteca como un espazo de igualdade, aprendizaxe e imaxinación, animando aos oíntes a descubrir o pracer dos libros e a converter a lectura nun hábito cotián.

Nos ENLACES podedes ver o traballo realizado polo alumnado de terceiro a sexto de primaria

O día 8 acudimos a Santiago  de Compostela porque estabamos convocados como finalistas. E sudeceu algo máxico, como o que nos está deixando este curso; un ano cheo de maxia na nosa Torre Encantada dos Soños. Este premio é un recoñecemento a  un curso cheo de traballo e ilusión, e moito esforzo por parte do profesorado. Grazas compañeir@s por facer que os nosos soños se cumplan!

Noraboa ao noso alumnado por facer maxia coas súas palabras!

Abril: Mes dos libros

No mes de abril andivemos moi ocupados na Biblio, porque celebramos o mes dos libros!!

O alumnado de 1º a 4º de Primaria recibiu a visita de Sabela Fernández Trelles, autora de dous títulos que leron este curso: "O ladrón de soños" e "A miña avoa, a miña heroína". Falounos de soños, pesadelos, do importante que é ter unha rede de apoio para superar os baches... e ata cantamos! Que importante compartir libros xuntos e reflexionar sobre eles.

Ademáis, o alumnado de 1º e 2º fixo un programa de radio sobre "O ladrón de soños", que presentaron a un concurso organizado pola editorial Xerais, a Fundación José Hermida xunto con Radio Pontevedra. 

Aquí podedes escoitalo!

No contexto lingüístico investigamos ao redor dos libros: beneficios de ler, os libros máis lidos da historia, escritores famosos, como naceu o Día do libro.... Tamén aproveitamos un recanto para gravar os booktubers, pasamos por Radio Faladoiro para facer un programa especial sobre esta conmemoración e gravamos libro-historias, usando as portadas e os títulos dos libros para contar historias breves.

Ademáis realizáronse apadriñamentos lectores nos que o alumnado de 3º a 6º, dentro do programa T+t, prepararon lecturas de contos para os máis cativos de 1º ciclo e infantil.

Ademáis fixemos o xa clásico "Hoxe no patio, libro!" aproveitando o tempo de lecer para adicar un ratiño á lectura libre e autónoma.

O alumnado de infantil  e 1º de Primaria foron ao teatro para ver unha obra basada nun dos contos máis famosos de todas as bibliotecas escolares: "A toupiña que quería saber quen lle fixera aquelo na cabeza" por parte da compañía "A xanela do Maxín".

Tamén desfrutamos moito na nosa biblio co espectáculo "A ilusión de ler" por parte da compañía "Maxia na manga", no que quedamos abraiados con moitos trucos con inspiración literaria.

E para rematar o mes de abril visualizamos todos os vídeos que se gravaron ao longo do mes recomendando lecturas, todos convertidos en auténticos Booktubers. Aquí tedes algúns exemplos!

Un mes de Abril do máis completo!! 

Lémonos!

Un Entroido con moita maxia

Como se dunha chisteira saísen os coellos dun mago, así apareceu a cativada de Infantil para darlle a benvida ao Entroido. Entre ilusións, sorrisos e moita fantasía, o patio do colexio transformouse nun escenario máxico.

Harry Potter abriu as portas a un bosque encantado no que habitaban fadas, trasnos, elfos e gnomos seguidos de personaxes saídos das películas O Mago de Oz e Wicked, enchendo cada recuncho de cor, música e fantasía.

O colexio enteiriño converteuse nun lugar, onde a imaxinación era a mellor varita e cada neno e nena, un pequeno feiticeiro capaz de facer realidade o imposible.

Todo o alumnado pasou polo esceario para entoar as cancións do proxecto, creadas con moita maxia polo profe Jose, para rematar cunha degustación de doces típicos aportados polas familias, que nos acompañaron neste día tan especial

Podedes escoitar  o programa de radio de Entroido, que gravaron os alumn@s de primeiro e segundo nos obradoiros de linguas.

Durante toda a semana estivemos atentos aos mandadiños de Torriño.

Pechamos unha época chea de maxia, pero xa estamos argallando un plan, porque a Torre Encantada dos Soños non descansa.

Rosalía na Torre dos encantada dos Soños

A homenaxe a Rosalía de Castro, converteuse nunha celebración chea de emoción, palabra viva e orgullo pola nosa autora máis universal. No aniversario do seu nacemento, o alumnado mergullouse na súa obra para crear novos poemas inspirados nos seus versos, xogando co ritmo, coa musicalidade e coa forza do amor por Galicia, que  Rosalía deixou como legado. Cada creación foi unha maneira  de traer ao presente a súa voz e de facer propia a súa sensibilidade compartindo os seus soños cos do alumnado.

O traballo poético completouse cunha visita a Radio Faladoiro, onde os nenos e nenas recitaron fragmentos da obra rosaliana a modo de feitizos.

Non deixedes de escoitar os programas de radio adicados a Rosalía, porque lembrar a Rosalía é querer a Galicia.

Celebrar a Rosalía é tamén celebrar a lingua, a cultura e a historia que nos une!

Obradoiro de Rap

Hoxe na Torre encantada dos soños do Torre-Cela, os alumnos de 5° e 6° de primaria, tivemos a sorte de contar, a través da nosa biblioteca creativa, cun obradoiro de rap, a cargo de Pedro Iglesias, especialista en comunicación audiovisual e técnicas de rap.

Impartiunos un obradoiro de escritura de rap, que se iniciou nas técnicas e recursos tamén de poesía, para terminar enlazándoo e escribindo uns versos que rapeamos sobre unha base musical.

Moitas grazas Pedro, foi un verdadeiro pracer aprender hoxe contigo!

Día Mundial da Radio

 

Hoxe en Radio Faladoiro, a radio do noso cole, celebramos con moita ilusión o Día Mundial da Radio. Este medio tan especial acompáñanos, ensínanos e conéctanos, e nós quixemos renderlle homenaxe facendo o que mellor sabemos facer: comunicar, crear e compartir.

Ao longo destes días estivemos a preparar programas inspirados na iniciativa de  Ponte nas Ondas!, que nos anima a dar voz ás nosas ideas, ás nosas historias e á nosa cultura. 

En Radio Faladoiro seguimos apostando por unha radio feita con corazón, con creatividade e con moitas ganas de aprender. Porque a radio é emoción, é compañía, é imaxinación… e tamén é unha festa que celebramos xuntos.

Aquí vos deixamos os programas realizados para conmemorar este día máxico.

Que viva a radio, que vivan as ondas e que siga a maxia de comunicar coas voces que as fan posibles!

O Nadal máis máxico está en Torre Cela

O Nadal é un tempo especial no que as luces non só  iluminan as rúas  senón tamén  os corazóns. É a época na que os soños parecen máis próximos, porque cada desexo se envolve en  ilusión. No noso cole,  compartimos momentos que nos lembran que a maxia non está nos agasallos, senón na xente que nos rodea.

Pasamos por radio Faladoiro para facer programas máxicos, desfrutamos decorando o cole, cantando ao Nadal polas rúas de Cela, recibimos a visita de Papá Noel e celebramos unha fermosa festa de Fin de Ano.

Podedes escoitar aquí os programas de Nadal       

Tamén desfrutamos dunha serie de obradoiros por parte das familias do cole: cociña, contos, monicreques, costura, manualidades... tivemos de todo!

Cada neno e nena leva consigo un soño, pequeno ou grande, e o Nadal convídanos a crer que todo é posible. É tempo de amizade, de solidariedade e de imaxinar un futuro mellor. Porque cando soñamos xuntos, a maxia do Nadal faise realidade. 

Desexámosvos un Feliz Nadal e que se cumplan os vosos soños!